දූෂණ චෝදනා මත බලශක්ති ඇමති කුමාර ජයකොඩිට මහාධිකරණයෙන් අධිචෝදනා බාර දීලා...

දූෂණ චෝදනා මත බලශක්ති ඇමති 

කුමාර ජයකොඩිට මහාධිකරණයෙන් 

අධිචෝදනා බාර දීලා...

ලංකා පොහොර සමාගමේ කළමනාකරුවෙකු ලෙස කටයුතු කළ සමයේ රජයට රුපියල් ලක්ෂ 88 කට අධික පාඩුවක් සිදුකිරීම ඇතුළු දූෂණ චෝදනා සම්බන්ධයෙන් බලශක්ති අමාත්‍ය කුමාර ජයකොඩි මහතාට කොළඹ මහාධිකරණය හමුවේ ඊයේ (මාර්තු 27) අධිචෝදනා පත්‍ර භාර දෙනු ලැබීය.

කොළඹ මහාධිකරණ විනිසුරු රශාන්ත ගොඩවෙල මහතා ඉදිරියේ මෙම අධිචෝදනා භාරදීම සිදු වූ අතර, අනතුරුව අමාත්‍යවරයා රුපියල් ලක්ෂ 10 බැගින් වූ ශරීර ඇප දෙකක් මත මුදා හැරීමට විනිසුරුවරයා නියෝග කළේය. මීට අමතරව විත්තිකරුගේ ඇඟිලි සලකුණු ලබාගෙන වාර්තාවක් කැඳවන ලෙසත්, නඩුවේ පූර්ව නඩු විභාග සම්මන්ත්‍රණය මැයි මස 06 වනදා පවත්වන ලෙසත් අධිකරණය නියම කළේය.

අල්ලස් හෝ දූෂණ චෝදනා විමර්ශන කොමිෂන් සභාව විසින් මෙම නඩුව පවරා ඇත්තේ 2016 වසරේ සිදුවීමක් පාදක කරගනිමිනි. එකල ලංකා පොහොර සමාගමේ ප්‍රසම්පාදන සහ ආනයන අංශයේ කළමනාකරු ලෙස සේවය කළ කුමාර ජයකොඩි මහතා, හුණුපිටිය ගබඩා සංකීර්ණ භූමියේ කාපට් ඇතිරීමේ කොන්ත්‍රාත්තුවක් පෞද්ගලික සමාගමකට ලබාදීමේදී රජයට රුපියල් **8,859,708.00** ක පාඩුවක් සිදු කර ඇති බවට චෝදනා එල්ල වී ඇත.

තමන්ට එල්ල වී ඇති චෝදනා ප්‍රතික්ෂේප කරන අමාත්‍යවරයා, මෙය ප්‍රසම්පාදන ක්‍රියාවලියක සිදු වූ දෝෂයක් බව පවසයි. මේ පිළිබඳව රූපවාහිනී වැඩසටහනකදී අදහස් දැක්වූ ඔහු සඳහන් කළේ, කළමනාකරුවෙකු ලෙස තමන්ට වගකීමක් පැවති නමුත් මෙය විෂය භාර නිලධාරියා අතින් සිදු වූ අතපසුවීමක් හෝ හිතාමතා කළ වරදක් විය හැකි බවයි.

මේ අතර, මෙම දූෂණ චෝදනාව සහ ප්‍රමිතියෙන් බාල ගල් අඟුරු ආනයනය කිරීම යන කරුණු මුල් කර ගනිමින් බලශක්ති අමාත්‍යවරයාට එරෙහිව සමගි ජන බලවේගය විසින් පසුගිය මාර්තු 19 වනදා කතානායකවරයා වෙත විශ්වාසභංග යෝජනාවක් ද භාර දෙනු ලැබීය. එවැනි බරපතළ චෝදනා පවතින පුද්ගලයෙකු අමාත්‍ය ධුරයක් දැරීමට සුදුසු නොවන බව විපක්ෂයේ මතය වී තිබේ.