ඩඩ්ලි පරාදයි - රත්න දිණුම්?

ඩඩ්ලි පරාදයි - රත්න දිණුම්? 

සහල් ලොවේ "රෝල්ස් රොයිස්" යුද්ධයේ ඇතුළු පැත්ත

නිසිත දනන්සූරිය.

පොළොන්නරුවේ ඉඳන් කොළඹට එන “හාල් රජවරුන්ගේ” මේ සුපිරි සෙල්ලම දැන් නිකම්ම ව්‍යාපාරික තරඟයකින් එහාට ගිහින්, හරියට අරාබි කුමාරවරුන්ගේ සෙල්ලමක් වගේ වෙලා නේද? මේක දැන් “හාල් කිලෝ එකේ ගාණ” ගැන නෙවෙයි, “රෝද හතරේ මිල” ගැන කතාවක් බවට පත්වෙලා.

ඔන්න එහෙනම්, ඩඩ්ලි සහ මිත්‍රපාලගේ මේ “රෝල්ස් රොයිස් වලිය” ගැන අපිට ආරංචි වුණු තවත් රස තොරතුරුත් එක්ක කතාව තවත් පොඩ්ඩක් “මිරිස් තුනපහ” දාලා මෙන්න මෙහෙම ලියාගමු.

ලංකාවේ හාල් මාර්කට් එක අල්ලගෙන ඉන්න පොළොන්නරුවේ දැවැන්තයෝ දෙන්නා, එහෙමත් නැත්නම් “ඩඩ්ලි සිරිසේන (අරලිය)” සහ “මිත්‍රපාල ලංකේෂ්වර (රත්න)” අතර දැන් තියෙන්නේ පුදුම “ගේමක්”. මේක හරියට අර ඉස්සර රජ කාලේ රජවරු ඇතුන් පිටින් ගිහින් බලය පෙන්නුවා වගේ වැඩක්. හැබැයි දැන් ඇත්තු වෙනුවට ඉන්නේ බ්‍රිතාන්‍යයේ හදපු ලොව සුපිරිම “Rolls-Royce” රථ!

ඩඩ්ලිගේ “ෆැන්ටම්” හීනය සහ රේගු හුටපටය

ඩඩ්ලි සිරිසේන මහතා මේ තරඟය පටන් ගත්තේ ලංකාවටම එකක් තියෙන “Rolls-Royce Phantom Series 8 (EWB)” රථයක් ගෙනල්ලා. දැක්කද ඒක ගෙනාවට පස්සේ මිනිහා දාපු කැටයම් සහිත ඇඩ් එක. මීඩියා කාරයෝ අල්ලගෙන ෂෝෂල් මිඩියා වලට වියදම් කරගෙන මිනිහා රටට ගෙනාපු පණිවිඩය මතක ඇතිනේ...“මම මේක ගත්තේ අවුරුදු 40ක් දුක් විඳලා” කියලා එයා හරි අපූරු කතාවක් කිව්වා. මතකනේ අර ලොරියක් ගන්න බිරිඳගේ රත්තරන් බඩු උකස් කරපු හැටි? ඒ කතාව නම් ඇත්තටම හැඟීම්බරයි.

හැබැයි වැඩේ ගැස්සුණේ වාහනේ “කැටගරි” එක මාරු වෙච්ච තැනදී. ලෝකෙටම 25ක් තියෙන “ලිමිටඩ් එඩිෂන් එකක්” කියලා මුලින් කිව්වට, රේගුවෙන් ඒක පිළිගත්තේ නැහැ. අන්තිමේදී රුපියල් මිලියන 70ක දඩයක් එක්ක, මුළු බදු මුදල විදිහට මිලියන 370ක් විතර ගෙවන්න වුණාම ඩඩ්ලිගේ "ෆැන්ටම්" හීනය ටිකක් රස්තියාදු වුණා. සමාජ මාධ්‍යවල මිනිස්සු ඇහුවේ “හාල් මිල වැඩි වෙද්දී මේවට සල්ලි කොහෙන්ද?” කියලයි.

මිත්‍රපාලගේ “කලිනන්” ප්‍රහාරය

ඩඩ්ලි පෑන්ටම් එක ගෙනල්ලා සද්දේ දාද්දී, රත්න සහල් අධිපති මිත්‍රපාල මහතා නිකම් හිටියේ නැහැ. එයා ගෙනාවේ රෝල්ස් රොයිස් පවුලේ ලොකුම අලියා වන “Cullinan Series II” එකක්. මේක SUV එකක් වුණාට මිලෙන් සහ අභිමානයෙන් ඩඩ්ලිගේ වාහනෙට වඩා පියවරක් ඉදිරියෙන් තියෙනවා කියලා තමයි කාර් පිස්සෝ කියන්නේ.

මිත්‍රපාල මහතාගේ විශේෂත්වය තමයි එයා ගොඩක් “ලෝ ප්‍රොෆයිල්” (Low Profile) එකේ ඉඳලා වැඩේ දෙන එක. එයා දැනටමත් හෙලිකොප්ටර් සර්විස් එකක් කරනවා, ගුවන් යානා ගන්න ප්ලෑන් කරනවා. ඩඩ්ලි සෝෂල් මීඩියාවල ලයිව් ඇවිත් කතා කරද්දී, මිත්‍රපාල කරන්නේ සද්ද නැතුව අලුත්ම මොඩල් එකේ වාහනයක් “ගරාජ් එකට” දාගන්න එක. ඒකයි ගොඩක් අය කියන්නේ “ඩඩ්ලි පරාදයි - රත්න දිණුම්” කියලා.

හාල් මෝලේ ඉඳන් අහසට.... ඊළඟ සටන “පුද්ගලික ජෙට්” යානා!

මේ දෙන්නගේ තරඟය දැන් පාරේ දුවන වාහනවලට විතරක් සීමා වෙන්නේ නැහැ. දැන් බැට්ල් එක තියෙන්නේ අහසේ.

“ඩඩ්ලි” සිංගප්පූරු එයාර් ෂෝ එකට ගිහින් “Cessna Citation Latitude” ජෙට් එකක් ගැන ඇහැ ගහගෙන ඉන්නවා.

“මිත්‍රපාල” රත්න ඒවියේෂන් (Rathna Aviation) හරහා තවත් සුපිරි ජෙට් එකක් ලංකාවට ගේන්න මඟ බලන් ඉන්නවා.

මේක ඇත්තටම “Rice Race in a Rolls-Royce” එකක් විතරක් නෙවෙයි, ලංකාවේ බිස්නස් ලෝකයේ තියෙන අමුතුම මාන්නයක්.

අපිට හිතෙන දේ...

මේ දෙන්නා වාහන වලින් තරඟ කරද්දී, අපිට නම් හිතෙන්නේ පොළොන්නරුවේ ගොවියෝ ටිකත් මේ වගේම පෝසත් වෙනවා නම් කොච්චර වටිනවද කියලා. ව්‍යාපාරිකයෝ දියුණු වෙන එක හොඳයි, හැබැයි ඒ දියුණුවේ “රෝල්ස් රොයිස්” සුවඳ කිලො පහේ හාල් මිටියක් ගන්න යන සාමාන්‍ය මනුස්සයටත් පොඩ්ඩක් හරි දැනෙන්න ඕනේ.

ඩඩ්ලි තමන්ගේ සන්නාමය ප්‍රසිද්ධ කරන්න දක්ෂයි, සරම අතට අරන් ‍චොප්පේ වගේ පාරට බැහැලා බැනගන්න චණ්ඩි කමටත් ඔට්ටුයි. හැබැයි අනිත් මනුස්සයා මිත්‍රපාල... එයා තමන්ගේ වැඩේ නිහඬව කරන්න දක්ෂයි. මේ “යුද්ධය” ඉස්සරහට තවත් රසවත් වෙයි. බලමුකෝ ඊළඟට කවුද අහස ජයගන්නේ කියලා!