රාජ්‍ය නිලධාරිනියකගේ “දැක්කොත් බුවා” සාක්ෂි...

2026 ජූලි මස 30 වැනිදා
ප්‍රමිතියෙන් තොර ප්‍රතිදේහ එන්නත් නඩු විභාගය.

රාජ්‍ය නිලධාරිනියකගේ

“දැක්කොත් බුවා” සාක්ෂි...

“ඖෂධ වංචා නඩුවේ සාක්ෂිකාරියගේ 

වගකීම් විරහිත උත්තර දීමේ රටාව
 
අධිකරණයේදී හෙළි වෙයි” 

සහකාර අධ්‍යක්ෂවරියගේ නොසැලකිල්ල හමුවේ 

විත්තියේ නීතිඥයින්ගෙන් දැඩි හරස් ප්‍රශ්න!

අධිකරණ වාර්තාකරු

ව්‍යාජ ලෙස සකසන ලද ඖෂධ සෞඛ්‍ය දෙපාර්තමේන්තුවට ලබා දීම සහ රුපියල් කෝටි 14 කට අධික රාජ්‍ය මුදලක් වංචා කිරීම ඇතුළු චෝදනා 14 ක් යටතේ හිටපු සෞඛ්‍ය අමාත්‍ය කෙහෙළිය රඹුක්වැල්ල ඇතුළු චූදිතයින් 12 දෙනෙකුට එරෙහිව නීතිපතිවරයා පවරා ඇති නඩුව, කොළඹ ස්ථිර ත්‍රිපුද්ගල මහාධිකරණයේදී පසුගිය 30 වනදා යළි විභාගයට ගැනිණි. ප්‍රියන්ත ලියනගේ (සභාපති), විරාජ් වීරසූරිය සහ තිලකරත්න බණ්ඩාර යන ත්‍රිපුද්ගල විනිසුරු මඬුල්ල හමුවේ මෙම නඩු විභාගය පැවැත්විණි.

එහිදී තෙවන දිනටත් සාක්ෂි සඳහා කැඳවා තිබුණේ සෞඛ්‍ය අමාත්‍යාංශයේ වෛද්‍ය සැපයීම් අංශයේ (MSD) හිටපු සහකාර අධ්‍යක්ෂ චාන්දනී මල්ලවආරච්චි මහත්මියයි. ඇය පැමිණිල්ල (රජය) වෙනුවෙන් සාක්ෂි දීමට පැමිණි ප්‍රධාන නිලධාරිනියක වුවද, විත්තියේ නීතිඥවරුන් වූ ඉසුරු ජයවර්ධන, අසේල සේරසිංහ සහ අමිත ආරියරත්න යන මහත්වරුන් නැගූ හරස් ප්‍රශ්න හමුවේ ඇය දැක්වූ ප්‍රතිචාර තුළින් උසස් රාජ්‍ය නිලධාරිනියකගේ වගකීම් විරහිතභාවය හා නොසැලකිලිමත් උත්තර දීමේ රටාව මනාව අනාවරණය විය.

රාජකාරි අත්සන තබා "මතක නැහැ" කියන හැටි

තෙවන චූදිත වෙනුවෙන් පෙනී සිටි නීතිඥ ඉසුරු ජයවර්ධන මහතා විසින් 'හියුමන් ඉමියුනෝග්ලොබියුලීන්' ඖෂධ තොග භාර ගැනීම සම්බන්ධයෙන් ප්‍රශ්න කිරීමේදී සාක්ෂිකාරිය ප්‍රකාශ කළේ තමන්ට ඒ පිළිබඳව "මතකයක් නැති" බවයි. කෙසේ වෙතත්, අදාළ ඉන්වොයිස් පත්‍ර පෙන්වූ පසු, තමන්ගේ අනුමැතිය මත සුජිත් නමැති නිලධාරියා අදාළ භාණ්ඩ භාරගෙන ඇති බව පිළිගැනීමට ඇයට සිදු විය.

එමෙන්ම ඖෂධ ගබඩා කිරීමේදී සෙල්සියස් අංශක 2-8 ත් අතර උෂ්ණත්වයක් පැවතිය යුතු වුවද, "room storage 30 (2-8C)" ලෙස සඳහන්ව තිබූ ඉන්වොයිස් පත්‍රයක් අනුමත කිරීම පිළිබඳව ප්‍රශ්න කළ විට ඇය පැවසූයේ, එවැනි දෝෂයක් ඇත්නම් බලන්නේ පළමු තොගයේදී පමණක් බවයි. රාජ්‍ය නිලධාරිනියක ලෙස සියලුම තොග පරීක්ෂා කිරීමේ වගකීමෙන් මිදීමට ඇය උත්සාහ කළ ආකාරය මෙහිදී පැහැදිලි විය. තවද, තමන් අත්සන් කර තිබුණද, මෙම ඖෂධ භාර ගැනීමට ඇත්තේ වෙනත් නිලධාරිනියක නිවාඩු ගිය දිනයක විය හැකි බව කියමින් වගකීමෙන් මිදීමට දැරූ උත්සාහය අධිකරණය හමුවේ කැපී පෙනුණි.

ගිණුම් සහ තොග පිළිබඳ දැනුමකින් තොරව කටයුතු කිරීම

පස්වන චූදිත වෙනුවෙන් පෙනී සිටි නීතිඥ අසේල සේරසිංහ මහතාගේ හරස් ප්‍රශ්න හමුවේ ඇගේ වගකීම් විරහිතභාවය තවදුරටත් තහවුරු විය. කෝටි 14 ක මහජන මුදල් වංචාවක් සිදුවී ඇති මෙම නඩුවේදී, අදාළ ඖෂධ තොගයේ වටිනාකම කොපමණදැයි ඇගෙන් විමසූ විට ඇය පැවසූයේ තමන්ට එය "මතක නැති" බවත්, එය ගණකාධිකාරීවරයා දැනගත යුතු කරුණක් මිස තමන්ට අදාළ නැති බවත්ය.

ජීවිතාරක්ෂක ඖෂධ භාරගන්නා උසස් නිලධාරිනියක ලෙස භෞතික රසායනික පරීක්ෂාවන් සිදු නොකර, ලිපි ලේඛන පමණක් සංසන්දනය කර අනුමැතිය දීම තමන්ගේ රාජකාරිය ලෙස දැක්වීමට ඇය පෙළඹුණි. එපමණක් නොව, අදාළ ඖෂධ භාර ගැනීම සම්බන්ධයෙන් ඇයට එරෙහිවද විනය පරීක්ෂණ පවත්වන බවත්, ඇගේ වැඩ තහනම් කර තිබී නැවත සේවයේ පිහිටුවා ඇති බවත් නීතිඥවරයා ඉදිරිපත් කළ කරුණු හමුවේ ඇයට පිළිගැනීමට සිදු විය.

පද්ධතිය සහ තොරතුරු සැඟවීමේ උත්සාහය

එකොළොස්වන චූදිත වෙනුවෙන් පෙනී සිටි නීතිඥ අමිත ආරියරත්න මහතා හරස් ප්‍රශ්න විමසීමේදී, ඖෂධ කළමනාකරණය සම්බන්ධයෙන් පූර්ණ දැනුමක් ඇති බව පැවසූ සාක්ෂිකාරිය, පද්ධතියට පිවිසීමේ හැකියාව සහ ප්‍රධාන තොග පාලකවරයාගේ කාර්යභාරය පිළිබඳ ප්‍රශ්න කිරීමේදී "මම දන්නේ නැහැ" යනුවෙන් පවසමින් උත්තර දීම මගහැරීමට උත්සාහ කළාය.

මෙහිදී නීතිඥවරයා "ඇයි හැංගෙන්නේ?" යනුවෙන් ප්‍රශ්න කරමින්, සාක්ෂිකාරිය තමන් දන්නා කරුණු නොදන්නා බව අඟවමින් අධිකරණය නොමග යැවීමට උත්සාහ කරන බවට දැඩි ලෙස යෝජනා කළේය. තමන් අත්සන් තබා රෙකමදාරු කළ (Recommend by) ලේඛනවල ඇති වගකීමෙන් මිදීමටත්, අනෙක් නිලධාරීන්ගේ සත්භාවය ගැන ඔවුන්ගෙන්ම අසා දැනගත යුතු බව කියමින් ලිස්සා යාමටත් ඇය දැක්වූ උත්සාහය දැඩි දෝෂදර්ශනයට ලක් විය.

මහජනතාවගේ බදු මුදලින් නඩත්තු වන, ජීවිත ආරක්ෂා කිරීමේ පරම වගකීම පැවරී ඇති සෞඛ්‍ය අමාත්‍යාංශයේ සහකාර අධ්‍යක්ෂවරියක වැනි ඉහළ නිලධාරිනියක්, මෙවැනි බරපතල ඖෂධ වංචාවක් හමුවේ අධිකරණය හමුවේ දැක්වූ මෙම වගකීම් විරහිත සහ නොසැලකිලිමත් උත්තර දීමේ රටාව විත්තියේ නීතිඥයින්ගේ දැඩි විවේචනයට ලක් විය. නඩුව යළි ජූලි 31 වන දින විභාගයට ගැනීමට නියමිතය.

සම්පූර්ණ නඩු වාර්තාව මෙසේය.

ව්‍යාජ ලෙස සැකසූ ඖෂධ සෞඛ්‍ය දෙපාර්තමේන්තුවට ලබා දීම සහ රුපියල් කෝටි 14 කට අධික රාජ්‍ය මුදලක් වංචා කිරීම ඇතුළු චෝදනා 14 ක් යටතේ හිටපු සෞඛ්‍ය අමාත්‍ය කෙහෙළිය රඹුක්වැල්ල ඇතුළු චූදිතයින් 12 දෙනෙකුට එරෙහිව නීතිපතිවරයා පවරා ඇති නඩුව, කොළඹ ස්ථිර ත්‍රිපුද්ගල මහාධිකරණයේදී පසුගිය 30 වනදා යළි විභාගයට ගැනිණි. ප්‍රියන්ත ලියනගේ (සභාපති), විරාජ් වීරසූරිය සහ තිලකරත්න බණ්ඩාර යන විනිසුරු මඬුල්ල හමුවේ මෙම නඩු විභාගය පැවැත්විණි.

එහිදී තෙවන දිනටත් සාක්ෂි සඳහා කැඳවා තිබුණේ සෞඛ්‍ය අමාත්‍යාංශයේ වෛද්‍ය සැපයීම් අංශයේ හිටපු සහකාර අධ්‍යක්ෂ චාන්දනී මල්ලවආරච්චිය.

තෙවන චූදිත වෙනුවෙන් පෙනී සිටින නීතිඥ ඉසුරු ජයවර්ධන සාක්ෂිකාරියගෙන් තවදුරටත් හරස් ප්‍රශ්න ඇසීම ආරම්භ කරන ලදී. එහිදී සාක්ෂිකාරිය මෙසේද පැවසුවාය.

නීතිඥ ; 294 දත්ත මත, 2023/11/24 වන විට රිටක්සිමැබ් 2148 ක් ජාතික තලයේ තිබුණා කියා යෝජනා කරනවා.

සාක්ෂිකාරිය ; එය පිළිගැනීමට දත්ත ප්‍රමාණවත් නැහැ ස්වාමීනි. ජාතික යනුවෙන් එහි සඳහන් වී නැහැ.

නීතිඥ ; පැ 400 ලේඛනය ඔබලා සැකසූ එකක්. එහි නෝට් කියන තැනට පහලින් temperature කියන තැන සඳහන් වන්නේ කුමක්ද?

සාක්ෂිකාරිය ; 2-8 යනුවෙන්

නීතිඥ ; MSD V අක්‍ෂරය සහිත ඇරඹුම් ලැයිස්තුව ඔබ විසින් ඉදිරිපත් කළ පසු ඔබේ ඊළඟ රාජකාරිය වුණේ භාණ්ඩ භාර ගැනීමයි. ඔබ ඒ භාර ගැනීම ගැන සාක්ෂි දුන්නා

සාක්ෂිකාරිය ; එසේය ස්වාමීනී

නීතිඥ ; ඒ කුමන දිනවලද?

සාක්ෂිකාරිය ; මැයි බව මතකයි.

නීතිඥ ; මැයි එකොළහ දොළහ දිනවල කිව්වොත්..?

සාක්ෂිකාරිය ; ලේඛනයක් පෙන්නුවොත් පිළිගන්න පුළුවන්.

(පැ 336ලේඛනය සාක්ෂිකාරිය වෙත පෙන්වයි)

නීතිඥ ; මේ අනුව 2023 මැයි එකොළහ භාරගෙන තිබෙන්නේ 

සාක්ෂිකාරිය ; එසේය ස්වාමීනී.

නීතිඥ ; invoice පත්‍රයේ  ස්ටෝරේජ් ටයිප් කියන්නේ කුමක්ද ?

සාක්ෂිකාරිය ; 2-8 

නීතිඥ ; එය හරිද? ඩී කුමක්ද?

සාක්ෂිකාරිය ; ඩිග්‍රී යන වචනය එහි අංශක ගණන සඳහන් වෙන්නේ.

නීතිඥ ; පැ 338 A ලේඛනයද 2CD - 8 CD කියලා සඳහන් වෙන්නේ

සාක්ෂිකාරිය ; එසේය ස්වාමීනී 

නීතිඥ ; ඇනවුම් ලැයිස්තුවේ වගේ නෙවෙයි. මෙහි සඳහන් වන්නේ?

සාක්ෂිකාරිය ; ඇණවුම් ලැයිස්තුව සකසන්නේ අපි. නිෂ්පාදකයා මෙය සඳහන් කරන්නේ

නීතිඥ ; ස්ටෝරේජ් D - 20 - 8C කියා සඳහන් කරන ක්‍රම දෙකක් නැහැ කියා මා යෝජනා කරනවා. 

සාක්ෂිකාරිය ; මේ නිවැරදි ක්‍රමයයි ස්වාමීනි.

නීතිඥ ; ඔබ හියුමන් ඉමියුනෝග්ලොබියුලීන් ඖෂධය භාර ගත්තාද?

සාක්ෂිකාරිය ; මතකයක් නැහැ’

නීතිඥ ; භාර ගත්තා කියා මා යෝජනා කළොත්?

සාක්ෂිකාරිය ; ලේඛනයක් පෙන්නුවොත් කිව හැකි ස්වාමීනි...

නීතිඥ ; (ඉන්වොයිස් පත්‍රයක් පෙන්වයි) මේ ලේඛනය කුමක්ද?

සාක්ෂිකාරිය ; ඉන්වොයිස් පත්‍රයක්.

නීතිඥ ; හියුමන් ඉමියුනෝග්ලොබියුලීන් භාරදීමේ ඉන්වොයිස් පත්‍රයක් ලෙස හැඳින්විය හැකිද?

සාක්ෂිකාරිය ; එසේය ස්වාමීනී

නීතිඥ ; භාණ්ඩ භාරගෙන තිබෙන්නේ කවුද?

සාක්ෂිකාරිය ; සුජිත් මහතා

නීතිඥ ; එය භාර ගැනීමට අවසර දුන්නේ කවුද?

සාක්ෂිකාරිය ; මම විසින්’

නීතිඥ ; අනුමැතිය දුන්නේ කවදාද?

සාක්ෂිකාරිය ; 2022/08/25 

නීතිඥ ; ඔබේ අවධානය ස්ටෝරේජ් වෙත යොමු කරන්න

සාක්ෂිකාරිය ; room storiege 30 (2-8C) යනුවෙන් සඳහන් වෙනවා.

නීතිඥ ; මූලික සාක්ෂි ගනිද්දී, මෙහෙම සටහන් කරන්න බැහැ කිව්වා නේද?

සාක්ෂිකාරිය ; එසේය ස්වාමීනී

නීතිඥ ; මේ ගැන සැලකිල්ලක් දැක්වූවාද?

සාක්ෂිකාරිය ; සැලකිල්ල දැක්විය යුතු පළමු තොගය පිළිබඳවයි. වරදක් ඇතොත් පළමු තොගයේදී " කොරි ෂිට් " එකක් දැමිය යුතුයි

නීතිඥ ; මම යෝජනා කරනවා msd දෙද්දී පරීක්ෂා කළ යුතුයි කියා.

සාක්ෂිකාරිය; නැහැ ස්වාමීනි. මේ තොගයේ කොටසක් පමණ සම්පූර්ණ තොගයක් තිබී ඇති

නීතිඥ ; ඔබ එය භාරගත් නිසා කිසි ප්‍රශ්නයක් නැති බව කියන බව මම යෝජනා කරනවා. 

සාක්ෂිකාරිය ; මම අත්සන් කර ඇති බව ඇත්ත. පළමු කොටස තමයි පරීක්ෂා කළ යුතු

නීතිඥ ; හියුමන් ඉමියුනෝග්ලොබියුලීන් ඖෂධය dry freage තිබියදී කාමර උෂ්ණත්වය සෙල්සියස් අංෂක තිහකට තැබිය හැකියි. 

සාක්ෂිකාරිය ; මෙහි එය සඳහන්

නීතිඥ ; මෙහි හෝ කියා වචනය තිබුණු බව මම යෝජනා කරනවා.

සාක්ෂිකාරිය ; මට ඉන්වොයිස් එකක් බලා ඇල ඉර ගැන ප්‍රකාශ කළ හැකියි. මම ප්‍රතික්ෂේප කරනවා. මම මේ ඖෂධය භාරගන්න ඇත්තේ, ශාන්තිනී මහත්මිය නිවාඩු ගිය දිනයක විය හැකියි.  සුජිත් මහතා සේවය කරන්නේ ශාන්තිනී මහත්මිය සමඟයි. 

නීතිඥ ; (පැ 337 ලේඛනය පෙන්වයි) මෙය හඳුනා ගත හැකිද?

සාක්ෂිකාරිය ; පුළුවන් ස්වාමීනි.

නීතිඥ ; මේකත් පෙර පෙන්වූ ලේඛනය වගේමයි..?

සාක්ෂිකාරිය ; එසේය ස්වාමීනී. 

නීතිඥ ; කිසිදු අංශයකින් නිවැරදි දැයි සොයා බැලීමකින් තොරව අනුමත කර ඇතැයි මම යෝජනා කරනවා 

සාක්ෂිකාරිය ; ප්‍රතික්ෂේප කරනවා ස්වාමීනි.

නීතිඥ ; මෙම තොගය භාර ගනිද්දී ස්ටෝරේජ් ගැන කිසිවක් නොබලා භාරගත් බවට මම යෝජනා කරනවා.?

සාක්ෂිකාරිය ; ප්‍රතික්ෂේප කරනවා ස්වාමීනි.

නීතිඥ ; msd සහකාර අධ්‍යක්ෂ ලෙස ඔබ සේවය කළා. ඒ අන්දමින්ම සහකාර අධ්‍යක්ෂකවරියක් ඔබ හා සේවය කළා 

සාක්ෂිකාරිය ; එසේය ස්වාමීනි. 

නීතිඥ ; තුන්වන චූදිත යටතේ තිබූ ඖෂධ ගබඩා ඔබට භාර දුන්නා.

සාක්ෂිකාරිය ; 2024 දී මට ඒ ගබඩා බලන්න වුණා. 

නීතිඥ ; භාර ගැනීමේ ක්‍රමවේදය කුමක්ද?

සාක්ෂිකාරිය ; රාජ්‍ය ඖෂධ නිෂ්පාදන නීතිගත සංස්ථාවේ නිෂ්පාදන, spc හරහාත් සැපයුම්කරුවන් හරහාත් නිෂ්කාශනය කළා. 

නීතිඥ ; පැ 334 ලේඛනයේ දෙක අංකය යටතේ ඩිළිවරි ෂෙඩියුල් කළේ කවදාද  ? 

සාක්ෂිකාරිය ; 2022/12/07 

නීතිඥ ; මේ අයිතමය ලැබුණේ ප්‍රමාද වෙලා

සාක්ෂිකාරිය ; උපදෙස් සහිත මිනිට් යටතේ භාරගත්තේ. 

නීතිඥ ; 2024/04/18 ඇතුළු අවස්ථා හතරකදී ඔබ ප්‍රකාශ දුන්නා. එහිදී අත්‍යවශ්‍ය පිළිකා ඖෂධ කියන වචනය ප්‍රකාශ කළාද? නැද්ද?

සාක්ෂිකාරිය ; ඒ ප්‍රකාශය දුන් දිනය මතක නෑ

නීතිඥ ; ඔබ ලබාදුන් ප්‍රකාශ කියවා තේරුම් කරදී, අත්සන් කරනු ලැබුවාද?

සාක්ෂිකාරිය ; එය එවේලේ එසේ සිදු වුණා

නීතිඥ ; 2023/05/22 දින රිටක්සිමැබ් භාර ගැනීමට දායක වුණාද?

සාක්ෂිකාරිය ; දායක වුණා ස්වාමීනී

නීතිඥ ; තොග ගැන අවධානය යොමු කළාද?

සාක්ෂිකාරිය ; පරීක්ෂා නොකළේ නියෝජ්‍ය අධ්‍යක්ෂ ජනරාල්ගේ උපදෙස් මත

නීතිඥ ; 2023/05/11 දිනට කොපමණ තිබුණද?

සාක්ෂිකාරිය ; තුන්දහස් ගණනක් කියා මතකයි ගණන හරියට මතක නෑ.

නීතිඥ ; මම යෝජනා කරනවා 6131 ක් තිබුනා කියා

සාක්ෂිකාරිය ; ප්‍රතික්ෂේප කරනවා.  ඖෂධ ගණන් ගැනීමේදී ගනන් ගන්නේ ඇතුලේ ඇති තොග.

නීතිඥ ; රිටක්සිමැබ් ගැන මතකද?

සාක්ෂිකාරිය ; නැහැ ස්වාමීනි

නීතිඥ ; රිටක්සිමැබ් 50ml 6131 ක්ද ජාතික තොග 7321 ක්ද තිබුණා කියා පිළිගන්නවද?

සාක්ෂිකාරිය ; එම ඇණවූම නිකුත්කිරීමේදී සටහන් කර තිබෙනවා

නීතිඥ ; ඔබ රාජකාරි කටයුතු සද්භාවයෙන් කළාද? 

සාක්ෂිකාරිය ; ඔව් ස්වාමීනි 

නීතිඥ ; මම යෝජනා කරනවා යම් දෝෂයක් තිබුනනම් සලකා බැලීමට හැකියාවක් තිබුණා කියා. 

සාක්ෂිකාරිය ; එසේ විය හැකියි ස්වාමීනි. 

නීතිඥ ; තුන්වන චූදිත කිසිදු වරදකාරී හැඟීමක් නැතිව සද්භාවයෙන් කටයුතු කර ඇතැයි මායෝජනා කරනවා

සාක්ෂිකාරිය ; ඇගේ සත්භාවය ඇගෙන්ම අසා දැනගත යුතුයි.

(පස්වන චූදිත වෙනුවෙන් පෙනී සිටින නීතිඥ සේරසිංහ හරස් ප්‍රශ්න විමසීම ආරම්භ කළේය)

නීතිඥ ; මේ නඩුවට පදනම් වූ ඖෂධ මිලදී ගැනීම ගැන ඔබ දැනුවත්ද?

සාක්ෂිකාරිය ; මිලදී ගැනීම ගැන දැනුවත් නැහැ.

නීතිඥ ; රිටක්සිමැබ් ඖෂධය භාර ගැනීමේ ක්‍රියාවලිය භාරව ඔබ කටයුතු කළේ. එහි තොග පාලන නිලධාරී ප්‍රියන්ත කස්තුරිසිංහ චෝදනා කරනවා ඔබ වැරදි අන්දමින් තොගය භාර ගත්තා කියා..?

සාක්ෂිකාරිය ; එවැනි චෝදනාවක් මම දන්නේ නැහැ.

නීතිඥ ; සී අයි ඩීය ඔබෙන් කට උත්තර ගත්තානේද ?

සාක්ෂිකාරිය ; එහිදී භාණ්ඩ මිලදී ගැනීම් ගැන කීවා.

නීතිඥ ; එහෙනම් කුමක් සඳහා ද සාක්ෂි දෙන්නේ?

සාක්ෂිකාරිය ; නිශ්චිත හඳුනාගත් ඖෂධ දෙකක් ගැන 

නීතිඥ ; රිටක්සිමැබ් වෛද්‍ය සැපයුම් ඒකකයට භාර ගද්දී සිටි තොග පාලන නිලධාරී කස්තුරිසිංහ. ඔබ ඔහුට උඩින් සිටි නිලධාරියා. 

සාක්ෂිකාරිය ; ඔව් ස්වාමීනි,  එය ව්‍යාජ ලෙස සකසන ලද්දක් බවට චක්‍රලේඛයක් නිකුත් කළා

නීතිඥ ; මේ නඩුවත් ඒක ගැන තමයි.

සාක්ෂිකාරිය ; එසේය ස්වාමීනි

නීතිඥ ; ඔය භාර ගැනීමේ ක්‍රියාවලියට ඔබත් දායක වෙලා තියෙනවා..?

සාක්ෂිකාරිය ; එසේය ස්වාමීනි.

නීතිඥ ; ප්‍රියන්ත කස්තුරිසිංහත් දායක වෙලා තියෙනවා.?

සාක්ෂිකාරිය ; ඔහු ගබඩා භාරකරු.

නීතිඥ ; ඔබත් ඔහුත් විත්තිකරු නෙවෙයි..?

සාක්ෂිකාරිය ; එසේය ස්වාමීනී.

නීතිඥ ; එම ඖෂධ තොගයේ වටිනාකම කොපමණද?

සාක්ෂිකරු ; මතක නැහැ ස්වාමීනී.

නීතිඥ ; පොදු දේපළ පනත යටතේ මුදල් අවභාවිතාවක් වෙලා තියෙනවා කියලා කියනවා.? 

සාක්ෂිකාරිය ; එසේය ස්වාමීනි. 

නීතිඥ ; ඖෂධ වර්ග දෙකෙන් වැඩි වටිනාකමක් ඇත්තේ කුමක්ද?

සාක්ෂිකාරිය ; එය ඝනකාධිකාරී දන්නේ. මට ඇත්තේ ඇණවුම් ටික බලා ගැනීමයි. 

නීතිඥ ; මම යෝජනා කරනවා එම ඖෂධ වර්ග දෙක කෝටි දාහතරක් කියාත් , එයින් කෝටි දෙකක් රිටක්සිමැබ්වලට කියා මම යෝජනා කරනවා..?

සාක්ෂිකාරිය ; මම ප්‍රතික්ෂේප කරනවා. මම සේවය කරන්නේ ගිණුම් අංශයේ නෙවෙයි. 

නීතිඥ ; ඔබ සේවය කරන තැන වංචාවක් වෙලා. ඔබ බලන්නේ ඇණවුම විතරයි..?

සාක්ෂිකාරිය ; එසේය ස්වාමීනි.

නීතිඥ ; සහකාර අධ්‍යක්ෂකටත් චෝදනාවක් තිබෙන බව දන්නවද?

සාක්ෂිකාරිය ; එසේය ස්වාමීනී.

නීතිඥ ; තොග පාලක ගොනුව සංසන්දනය කරලා තොගය භාර ගන්නවා. එය එසේ කරලද?

සාක්ෂිකාරිය ; එසේය ස්වාමීනී.

නීතිඥ ; හියුමන් ඉමියුනෝග්ලොබියුලීන් ඉන්වොයිස් තුනකට ඔබ අත්සන් කරලා. 

සාක්ෂිකාරිය ; එසේය ස්වාමීනී

නීතිඥ ; මෙම නඩුවේ 25 ට ඉන්වොයිස් තුනක් ඔබ අනුමත කර තිබෙනවා.

සාක්ෂිකරු ; එසේය ස්වාමීනි.

නීතිඥ ; පැ 377, 378, 380 කියන ලේඛන වලින් හියුමන් ඉමියුනෝග්ලොබියුලීන් භාර ගැනීමට ඔබ අනුමැතිය දුන් අවස්ථා තුනක් ඔබ අවංකව හරියට එය කරලා තියෙනවා..?

සාක්ෂිකාරිය ; ස්වාමීනි, මෙහි වරදක් තිබුනනම් පළමු තොගයේදී බලන්න ඕන

නීතිඥ ; භාණ්ඩ තොග වශයෙන් භාරගත් ඉන්වොයිස් තුනක්. මේ අවස්ථා තුනම ඔබ අනුමත කර භාරගෙන තිබෙනවා

සාක්ෂිකාරිය ; සංසන්දනය කර භාරගෙන තිබෙනවා රාජකාරිමය වශයෙන්

නීතිඥ ;  එහෙමනම් ඔබගේ රාජකාරිමය ස්වභාවය ගැන සී අයි ඩී ගිය වෙලාවේ , භාණ්ඩ භාර ගැනීමේ කටයුත්ත කරන්නේ භෞතිකමය වශයෙන් ඒවායේ ගුණාංග පරීක්ෂා කරලද කියලා බැලුවද?

සාක්ෂිකාරිය ; සාම්පලය බලන්නේ පිරිවිතර විතරයි.

නීතිඥ ; ඔබට බැහැනේ! ඔය සාම්පලවල රසායනික තත්ත්වය බලන්න. ඊට පහසුකම් නැහැනේ..?

සාක්ෂිකාරිය ; ලිපි ලේඛන බලන්නේ එය තහවුරු කර ගැනීමට. මෙම ඖෂධ සමග co පත්‍රය එවලා.

නීතිඥ ; මම කියන්නේ රසායනික මෙනුල පරීක්ෂා කරන්න බැරි එක. ලේඛන සමග භෞතික පරීක්ෂා කරනවා..? 

සාක්ෂිකාරිය ; එසේය ස්වාමීනී. 

නීතිඥ ; WR ලේඛනය ගැන විමසිලිමත් වුණා. ..... මැයි ජූනි වෙද්දි WR ගැන ඔබ ඇතුළු නිලධාරීන්ට පූර්ණ දැනුමක් දුන්නා.

සාක්ෂිකාරිය ; නැත ස්වාමීනි.

නීතිඥ ; ඔබේ කට උත්තරවල කියා තිබුණා WR ගොනුව සමග එන්නේ WR හි ඡායාස්ථ පිටපතක් කියා

සාක්ෂිකාරිය ; එසේය ස්වාමීනී.

නීතිඥ ; spc සහ දේශීය සැපයුම් භාණ්ඩ වෙනම පරීක්ෂා කර පලපුරුද්ද තිබෙනවාද? විදේශීය රටකින් එන ඖෂධ භාර ගැනීමට පලපුරුද්ද තියෙනවද ?

සාක්ෂිකාරිය ; මතකයක් නැහැ.

නීතිඥ ; WR විදේශීය සැපයුම් සඳහාද ? දේශීය ඖෂධ සඳහාද?

සාක්ෂිකාරිය ; ආයතනික ඖෂධ සඳහා

නීතිඥ ; ඔබේ ආයතනය තුළ WR නිසි ලෙස ක්‍රියාත්මක වුණාද කියා විමර්ශන වුණා..?

සාක්ෂිකාරිය ; එසේය ස්වාමීනි.

නීතිඥ ; ඔබෙත් වැඩ තහනම් කොට විනය පරීක්ෂණයක් තැබුවා WR පරීක්ෂාව ගැන..?

සාක්ෂිකාරිය ; ඔව්.

නීතිඥ ; පස්වන විත්තිකරුටත් එවැනි පරීක්ෂණයක් තිබුනා කියා දන්නේ නැද්ද ? 

සාක්ෂිකාරිය ; නැහැ ස්වාමීනී.

නීතිඥ ; ඔබ පරීක්ෂණයට ගියේ කුරුකුලසූරිය නමැති රැකවල්කරු සමග. ඔහු පස්වන විත්තිකරුටත් ඉදිරිපත් වූ බව ඔබ දන්නේ නැද්ද?

සාක්ෂිකාරිය ; දන්නේ නැහැ ස්වාමීනි.

නීතිඥ ; WR  ගැන නිසි තහවුරු කර ගැනීමක් නොකළාය කියන එකට ඔබ නිදහස් කළාද?

සාක්ෂිකාරිය ; පරීක්‍ෂණ තවම යනවා

නීතිඥ ; ඔබ සේවයේ පිහිටෙව්වා

සාක්ෂිකාරිය ; එසේය ස්වාමීනී.

නීතිඥ ; ඔබට මතකද සුජිත් වසන්ත කුමාර නැවත සේවයට එනවා..?

සාක්ෂිකාරිය ; මුලදී දැනුවත්. දැන් දන්නෙ නැහැ.

නීතිඥ ; ප්‍රියන්ත කස්තුරිසිංහත් වැඩ තහනමට ලක්වුණාද?

සාක්ෂිකාරිය ; මම වැඩ තහනමට ලක්වුණා. ඔහු ගැන මම දන්නේ නැහැ. මම ඔහු දන්නේ 2024/09 මාසය වනතුරු පමණයි. ඉන්පසු දන්නේ නැහැ.

නීතිඥ ; ඔහුට පරීක්ෂණය තිබුණා කියලා දන්නෙත් නැද්ද?

සාක්ෂිකාරිය ; නැහැ ස්වාමීනි.

නීතිඥ ; spc යෙන් ලැබෙන ඖෂධ ඔබලා භාර ගත්තා..?

සාක්ෂිකාරිය ; ඔව් ස්වාමීනී.

නීතිඥ ; ඔවුන් සියලු පරීක්ෂා කිරීම් කරලා ඔබට තොග භාර දුන්නා.? 

සාක්ෂිකාරිය ;  ඔව්. 

නීතිඥ ; එහි මිලදී ගැනීම් ආස්ථීන් වෙනස් වුණාද ?

සාක්ෂිකාරිය ; මට ඒ ගැන කිව නොහැකියි

නීතිඥ ; ආධාර දෙන ආයතනවලින් ඖෂධ දෙනවා නේද?

සාක්ෂිකාරිය ; ඒවාට msd නිලධාරීන් පත් කර තිබෙනවා. 

නීතිඥ ; මේ ප්‍රදානය කවදා කොහෙදී කළාද දන්නවද? 

සාක්ෂිකාරිය ; දන්නේ නැහැ. ප්‍රදාන ලැබී තිබුණා.  

නීතිඥ ; එහි ප්‍රසම්පාදන අවස්ථා දන්නෙත් නැද්ද?

සාක්ෂිකාරිය ; නැහැ.

නීතිඥ ; WR   පදනම් වන්නේ ආයතනික ඖෂධවලට..?

සාක්ෂිකාරිය ; එසේය ස්වාමීනි.

නීතිඥ ; පැ 380 ඔබ විසින් අනුමැතිය පළ කරන ලද එකක්. එහි උෂ්ණත්වය කවරාකාරයෙන් ගබඩා කරන්නද කියා තිබුණේ?

සාක්ෂිකාරිය 2-8 ප්‍රමාණයෙන්

නීතිඥ ; පැ 330 පරීක්ෂා කළාද?

සාක්ෂිකාරිය ; ප්‍රශ්නයක් ඇත්නම් මුල් තොගය පරීක්ෂා කළ යුතුයි

නීතිඥ ; ප්‍රශ්නයක් ඇත්නම් ඉහලට පැමිණිලි කළ යුතුයි.

සාක්ෂිකාරිය ; මෙය භාර අධ්‍යක්ෂවරියක් සිටියා. ඇය නිවාඩු දිනක මෙය මා භාර ගත්තා නම් ඒත් ඇය වගකිව යුතුයි. 

නීතිඥ ; ඔබත් සහකාර අධ්‍යක්ෂවරියක්. කොටු මුද්‍රාව යට ඔබත් අනුමැතිය පළ කර තියෙනවා.

සාක්ෂිකාරිය ; ඔව් තොගය භාර ගැනීම් කළා.

නීතිඥ ; ඔබ අධිකරණය ඉදිරියේ දිවුරා තිබෙනවා මේ ලේඛනවල අනුමැතිය දක්වා අත්සන මගින් නිරූපිත සියලු දේ නිවැරදි බවට අත්සන් කර අනුමැතිය දී තිබෙනවා..?

සාක්ෂිකාරිය ; එසේය ස්වාමීනි.

නීතිඥ ; රිටක්සිමැබ් ගැන ක‍ළෙත් එහෙමයි.?

සාක්ෂිකාරිය ; එසේය ස්වාමීනී.

නීතිඥ ; හියුමන් ඉමියුනෝග්ලොබියුලීන් ගැන කළෙත් ඒ වගේමයි.?

එකොළොස්වන චූදිත වෙනුවෙන් පෙනී සිටින නීතිඥ අමිත ආරියරත්න හරස් ප්‍රශ්න ඇසීම ආරම්භ කරයි.

නීතිඥ ; ඔබ දේශන පවත්වා තිබෙනවා..?

සාක්ෂිකාරිය ; ඖෂධ වේදය ඉගෙන ගන්න සිසුන්ට දේශන පැවැත්වුවා.

නීතිඥ ; ඒ කියන්නේ ඉගැන්වීමට දන්නවා..?

සාක්ෂිකාරිය ; දායක වෙලා තියෙනවා.

නීතිඥ ; ඔබට දැනුම තිබෙනවා ක්ෂේත්‍රය ගැන..?

සාක්ෂිකාරිය ; එසේය ස්වාමීනී

නීතිඥ ; අතිරික්ත කියන්නේ ඖෂධ තිබුණාම කල්ඉකුත් වීමද?

සාක්ෂිකාරිය ; අතිරික්ත කියන්නේ අනවශ්‍ය ලෙස ඇනවුම් කිරීමයි.

නීතිඥ ; එහෙම හිතු හිතු විදියට ඇනවුම් කරන්න බැහැනේ. අතිරික්ත පැවතීම රජයට පාඩුවක් නේද?

සාක්ෂිකාරිය ; එසේය ස්වාමීනි.

නීතිඥ ; ඔබ දන්නවා සෑම ඖෂධයකටම අපේක්ෂිත ආයු කාලය. ආයතනික ඖෂධවල ජීව කාලය සියයට අසූවක් දක්වා තිබිය යුතුයි.? 

සාක්ෂිකාරිය ; එසේය ස්වාමීනී.

 නීතිඥ; spc තොග නම් මාස 21 ක් දක්වා අපේක්ෂිත ආයු කාලය තිබිය යුතුයි.?

සාක්ෂිකාරිය ; මට මතක මාස විසි හතරක් කියලයි. 

නීතිඥ ; ඒ ඒ ඖෂධ ඇනවුම් කිරීමේදී ඒ ලයිෆ්  එක ගැන තීරණය ගත යුතුයි..?

සාක්ෂිකාරිය ; ඖෂධ සපයා ගැනීම රජයේ වගකීමක්.

නීතිඥ ; රටක ඖෂධ සැපයීම කළමනාකරණය නොවුනොත් මොකද වෙන්නේ?

සාක්ෂිකාරිය ; ඖෂධ නැතිවෙනවා.

නීතිඥ ; ඖෂධ නැති වුනොත් මොකද වෙන්නේ? නරක ප්‍රතිවිපාක ඇතිවෙනවා..?

සාක්ෂිකාරිය ; එය වෙලා ස්වාමීනි.

නීතිඥ ; ඔබ F 1, F0 කියලා සිස්ටම් එකක් ගැන දන්නවද?

සාක්ෂිකාරිය ; first expire , first out කියලා නම් දන්නවා.

නීතිඥ ; මම අදහස් කළේ කලින් ලැබෙන ඖෂධ කලින් පිට කළ යුතුයි කියලයි.? 

සාක්ෂිකාරිය ; මට හරියට මතක නෑ.

නීතිඥ ; short expiary කියලා හඳුනා ගත්තොත් කළමනාකරණය කරනවා.? 

සාක්ෂිකාරිය ; එසේය ස්වාමීනී.

නීතිඥ ; අතිරික්ත වෙලා අහක දැම්ම කියලා දැනගන්න තියෙනවද?

සාක්ෂිකාරිය ; එසේ දැනගන්න නැහැ.

නීතිඥ ; ඖෂධ කළමනාකරණයේදී Risk management කරනවා? 

සාක්ෂිකාරිය ; එය ක්‍රමවේදයකට කළ යුතුයි.

නීතිඥ ; ඔබ දන්නවා ලෝකල් පර්චස් කියන්නේ මොනවද කියලා..? 

සාක්ෂිකාරිය ; ඔව් ස්වාමීනි, ප්‍රාදේශීය මිලදී ගැනීම්. 

නීතිඥ ; ඖෂධ හිඟනම් මිලදී ගන්න අවසර දෙනවා..?

සාක්ෂිකාරිය ; එසේය ස්වාමීනී.

නීතිඥ ; රිටක්සිමැබ්වල රාජකාරිය පැවැරිලා තිබුණේ ඔබට..? 
 
සාක්ෂිකාරිය ; තොග පාලන නිලධාරියාට. ඔහු අත්සන් කළ පසුවයි මම නිර්දේශ කරන්නේ. 

නීතිඥ ; දැන් ඔහු කෝ?

සාක්ෂිකාරිය ; මගේ සේවය අත්හිටවන කොට ඔහු ලංකාවේ නැහැ.

නීතිඥ ; කස්තුරිසිංහට ප්‍රොන්ටෝ පද්ධතියට ඇතුල් විය හැකිද? 

සාක්ෂිකාරිය ; පුළුවන් ස්වාමීනී.

නීතිඥ ; ප්‍රධාන තොග පාලකට ඇතුල් වියහැකිද?

සාක්ෂිකාරිය ; මම දන්නේ නැහැ.

නීතිඥ ; ඇයි හැංගෙන්නේ? 

සාක්ෂිකාරිය ; තරයේ ප්‍රතික්ෂේප කරනවා.

නීතිඥ ; මොකක්ද?

සාක්ෂිකාරිය ; හැංගෙනවා කියන එක.

නීතිඥ ; මම යෝජනා කරනවා ඔබ දන්නා කරුණු නොදන්නා බව අඟවා අධිකරණය නොමග යවන බව.

සාක්ෂිකාරිය ; ප්‍රතික්ෂේප කරනවා.

නීතිඥ ; මම අහන්නේ නන්දන බණ්ඩාරට පද්ධතියට පිවිසිය හැකිද කියලයි.? 

සාක්ෂිකාරිය ; පුළුවන්කම තිබුණා.

නීතිඥ ;ඔබටත් පිවිසිය හැකියි.?

සාක්ෂිකාරිය ; ඔව් ස්වාමීනී.

නීතිඥ ; පැ 400 අත්සන කස්තුරිගෙ නේ. ඔහු මේ ලේඛන සකස් කළේ තොග පරීක්ෂා කිරීමට හැකියාව තිබියදී. ඔහු අධිකරණයේ කොතැනක හෝ ඉන්නවාද?

සාක්ෂිකාරිය ; නැත ස්වාමීනී.

නීතිඥ ;  Recommend by  කියා අත්සන් කළේ ඔබ. ඔබ සාක්ෂි දෙනවා,

සාක්ෂිකාරිය ; එසේය ස්වාමීනී.

නඩුව යළි ජූලි 31 වන දිනටත් විභාගයට නියමිත විය.