“රංග නිශාන්තගේ මරණය සැකයි” බිරිඳගෙන් පොලීසියට පැමිණිලි.

“රංග නිශාන්තගේ මරණය සැකයි”

බිරිඳගෙන් පොලීසියට පැමිණිලි.

පශ්චාත් මරණ පරීක්ෂණ වාර්තාව ප්‍රතික්ෂේප කරමින් 

ස්වාධීන පරීක්ෂණයක් ඉල්ලා උදය ගම්මන්පිලගෙන්

දැඩි විවේචනයක්.

මුදල් අමාත්‍යාංශයේ මහා භාණ්ඩාගාර සහකාර අධ්‍යක්ෂවරයකු ලෙස සේවය කරමින් සිටියදී සේවය අත්හිටුවීමට ලක්ව සිටි රංග නිශාන්ත මහතාගේ අභිරහස් මරණය සම්බන්ධයෙන් නිකුත් කර ඇති පශ්චාත් මරණ පරීක්ෂණ වාර්තාව පදනම් විරහිත සහ ගැටලු සහගත බව පවසමින් පිවිතුරු හෙළ උරුමයේ නායක, හිටපු අමාත්‍ය උදය ගම්මන්පිල මහතා අද විශේෂ මාධ්‍ය හමුවකදී සිය දැඩි විරෝධය පළ කර සිටියේය. මෙම මරණය සම්බන්ධයෙන් රංග නිශාන්ත මහතාගේ බිරිඳ විසින් දැනටමත් පොලිසියට පැමිණිල්ලක් ඉදිරිපත් කරමින් එය සැක සහිත බව පවසා ඇති පසුබිමක, රජය විසින් පත් කරන ලද වෛද්‍ය කමිටුවේ ක්‍රියාකලාපය දැඩි ප්‍රශ්න කිරීමකට ලක් විය යුතු බව ඒ මහතා අවධාරණය කළේය.

මුදල් අමාත්‍යාංශයේ සිදුවූ බව කියන දැවැන්ත පරිගණක වංචාවක් අනාවරණය කරගත් සහ ඒ පිළිබඳව රහස් පොලිසියට මුල්ම පැමිණිල්ල ඉදිරිපත් කළ පුද්ගලයා රංග නිශාන්ත මහතා බවත්, එවැනි තීරණාත්මක සාක්ෂිකරුවෙකු මෙලෙස අභිරහස් ලෙස මියයාම හුදෙක් අහම්බයක් ලෙස සැලකිය නොහැකි බවත් ගම්මන්පිල මහතා පැවසීය. විශේෂයෙන්ම ඕනෑම අපරාධ විමර්ශනයකදී තීරණාත්මක ලේඛනය වන්නේ මුල් පැමිණිල්ල වන අතර, එම පැමිණිලිකරුවා මියයාම විමර්ශන ක්‍රියාවලියට එල්ල කරන ලද දැවැන්ත බාධාවක් බව හෙතෙම පෙන්වා දුන්නේය. 

මෙම මරණය සම්බන්ධයෙන් පශ්චාත් මරණ පරීක්ෂණය පැවැත්වූයේ අධිකරණ වෛද්‍ය විශේෂඥවරුන් වන ඉලංගරත්න බණ්ඩා, අජිත් ජයසේන, සම්පත් සේනතුංග සහ ගාමිණී දිසානායක යන මහත්වරුන්ගෙන් සමන්විත කමිටුවකි. එම කමිටුවේ නිගමනය වී ඇත්තේ සිරුරේ ස්ථාන කිහිපයක ඇති වූ කැපුම් තුවාල හේතුවෙන් අධික ලෙස ලේ වහනය වීමෙන් මරණය සිදුවී ඇති බවත්, එය බොහෝ විට සිය දිවි නසා ගැනීමක් විය හැකි බවත්ය. කෙසේ වෙතත්, මෙම නිගමනයට එළඹීමට පෙර විද්‍යාත්මකව සිදු කළ යුතු අත්‍යවශ්‍ය පරීක්ෂණ රැසක් මඟහැර ඇති බවට ගම්මන්පිල මහතා චෝදනා කළේය. විශේෂයෙන්ම පටක වේදය (Pathology) සහ විෂ වේදය (Toxicology) පිළිබඳ පරීක්ෂණ වාර්තා ලැබීමටත් පෙර, කමිටුව මෙවැනි නිගමනයකට පැන්නේ කාගේ වුවමනාවකටදැයි ඔහු ප්‍රශ්න කළේය.

මියගිය පුද්ගලයාගේ ශරීරය තුළ යම් වසක් හෝ මත් වන ද්‍රව්‍යයක් තිබුණාද යන්න තහවුරු කරගැනීමට ලේ සහ මුත්‍රා සාම්පල පරීක්ෂා කිරීමට මහේස්ත්‍රාත්තුමා නියෝග කර තිබියදී, එම වාර්තා එනතුරු වෛද්‍ය කමිටුව ඉවසීමෙන් බලා නොසිටි බව හිටපු අමාත්‍යවරයා පැවසීය. යම් පුද්ගලයෙකුට සිහිය නැති වන අයුරින් යමක් ලබා දී, ඉන් අනතුරුව ඔහු අසිහියෙන් සිටින අතරතුර වෙනත් අයෙකු විසින් කැපුම් තුවාල සිදු කර එය සිය දිවි නසා ගැනීමක් ලෙස හුවා දැක්වීමට ඇති හැකියාව මෙහිදී බැහැර කළ නොහැකි බව ඔහු පෙන්වා දුන්නේය. එමෙන්ම අදාළ මාරක කැපුම් තුවාල සිදු කිරීමට භාවිතා කළ පිහියේ රංග නිශාන්ත මහතාගේ හැර වෙනත් අයෙකුගේ ඇඟිලි සලකුණු තිබේදැයි රජයේ රස පරීක්ෂකවරයා මගින් තහවුරු කරගන්නා තෙක් මෙවැනි නිගමනවලට ඒම වෘත්තීය මට්ටමින් අතිශය දෝෂ සහිත බව ඔහු පැවසීය.

ලෝකයේ පොදු සිය දිවි නසා ගැනීමේ ක්‍රම වන එල්ලී මැරීම හෝ වස පානය කිරීම වැනි ක්‍රම අතහැර, එකවර ප්‍රධාන නහර තුනක් (බල නහර) කපාගෙන මියයාම වැනි අතිශය වේදනාකාරී සහ දුර්ලභ ක්‍රමයක් රංග නිශාන්ත මහතා තෝරාගත්තා යැයි කීම තර්කානුකූල නොවන බව ගම්මන්පිල මහතා සඳහන් කළේය. එක් ප්‍රධාන නහරයක් කැපී ලේ විදින විට ඇති වන අධික වේදනාව සහ සිහිමද ගතිය හමුවේ තවත් අවයව දෙකක නහර කපා ගැනීමට තරම් චිත්ත ශක්තියක් සාමාන්‍ය මනුෂ්‍යයෙකුට පැවතිය නොහැකි බව වෛද්‍ය මතය බවද ඔහු සිහිපත් කළේය.

පශ්චාත් මරණ පරීක්ෂණ කමිටුවේ සංයුතිය පිළිබඳවද දැඩි විවේචනයක් එල්ල කළ ගම්මන්පිල මහතා, එහි සිටින වෛද්‍යවරුන් කිහිපදෙනෙකුගේ දේශපාලන පසුබිම පිළිබඳව කරුණු අනාවරණය කළේය. කමිටු සාමාජිකයන් දෙදෙනෙකු විශ්වවිද්‍යාල සමයේ ජනතා විමුක්ති පෙරමුණේ දැඩි ක්‍රියාකාරීන් බවත්, තවත් අයෙකු වත්මන් කතානායකවරයාගේ සමකාලීන මිතුරෙකු බවත් ඔහු පැවසීය. ආණ්ඩුව දෙසට සැකය යොමු වී ඇති අවස්ථාවක, ආණ්ඩුවේම හිතවතුන් සහ දේශපාලන ක්‍රියාකාරීන්ගෙන් සමන්විත කමිටුවක් හරහා මෙවැනි සංවේදී පරීක්ෂණයක් සිදු කිරීම මඟින් යුක්තිය ඉටු නොවන බව ඔහුගේ මතයයි.

ඕස්ට්‍රේලියාව සහ ඇමරිකාව වැනි දියුණු රටවලින් පශ්චාත් පුහුණුව ලැබූ මෙම විශේෂඥ වෛද්‍යවරුන්, විද්‍යාත්මක සාක්ෂි සහ පරීක්ෂණ වාර්තා ලැබීමට පෙර නිගමනවලට පැනීම එම රටවලින් උගත් දේ දැයි ගම්මන්පිල මහතා ප්‍රශ්න කළේය. පරීක්ෂණ මණ්ඩලයේ තෝරාගැනීම පදනම් විරහිත වීම, මරණය සැක සහිත බවට බිරිඳ කළ පැමිණිල්ල, මරණය සිදු වූ ආකාරයේ පවතින අසාමාන්‍යතාවය සහ පූර්ණ පරීක්ෂණයකින් තොරව වාර්තාව නිකුත් කිරීම යන කරුණු පහ මත පදනම්ව මෙම වෛද්‍ය වාර්තාව සම්පූර්ණයෙන්ම ප්‍රතික්ෂේප කරන බව ඔහු අවධාරණය කළේය.

අවසාන වශයෙන් උදය ගම්මන්පිල මහතා රජයට බලකර සිටියේ, මෙම මරණය සම්බන්ධයෙන් පවතින මහජන සැකය දුරු කිරීමට නම් වහාම මෙරට සිටින ජ්‍යෙෂ්ඨතම අධිකරණ වෛද්‍ය නිලධාරීන් තිදෙනෙකුගෙන් සමන්විත ස්වාධීන කමිටුවක් පත් කර දෙවන පශ්චාත් මරණ පරීක්ෂණයක් පවත්වන ලෙසයි. එසේ නොමැති වුවහොත් මෙම මරණය සම්බන්ධයෙන් ආණ්ඩුවට එල්ල වන චෝදනාවෙන් කිසිසේත් මිදිය නොහැකි බව ඔහු වැඩිදුරටත් සඳහන් කළේය. මෙම මරණය හුදෙක් පුද්ගලික මරණයක් නොව, රාජ්‍ය මූල්‍ය වංචා හෙළිදරව් කරන්නන්ට එල්ල වන මාරක අනතුරු ඇඟවීමක් විය හැකි බැවින් සත්‍යය අනාවරණය කර ගැනීම රටේම වගකීමක් බවද ඔහු පෙන්වා දුන්නේය.