පොලිස් රෝහලේ වෛද්‍ය සචිත්‍ර වීරසේකරගේ සේවය ඉවත් කිරීමට සැලසුමක්..!

දේශපාලන පළිගැනීමක්ද සැකයක්?

ශ්‍රී ලංකා පොලිස් රෝහලේ සේවය කරන සහකාර පොලිස් අධිකාරී, වෛද්‍ය සචිත්‍ර වීරසේකරගේ සේවය ලබන ජනවාරි මාසයේ සිට අවසන් කිරීමට ආණ්ඩුව සැලසුම් කර ඇති බව විශ්වාස කටයුතු ආරංචි මාර්ගවලින් වාර්තා වේ. විශ්‍රාමික නාවික හමුදා නිලධාරියකු හා හිටපු අමාත්‍යවරයකු වන රියර් අද්මිරාල් සරත් වීරසේකරගේ පුත්‍රයා වන වෛද්‍ය සචිත්‍ර, කැපවීමෙන් හා මනුෂ්‍යත්වයෙන් යුතු ව රාජකාරි ඉටුකළ වෛද්‍යවරයකු ලෙස පොලිස් රෝහලේ නිලධාරීන් අතර ඉහළ ගෞරවයට පාත්‍රව ඇත.

පොලිස් රෝහලේ ප්‍රතිකාර ලැබූ නිලධාරීන්ගේ සාක්ෂි අනුව, වෛද්‍ය සකිත්‍ර වීරසේකර රාත්‍රි දිවා නොබලා රෝගීන්ට සේවය කළ, විශේෂයෙන් කනිෂ්ඨ පොලිස් නිලධාරීන්ට ඉමහත් සහයක් ලබාදුන් වෛද්‍යවරයකු ලෙස සැලකේ. ඔහුගේ මනුෂ්‍යත්වය හා කැපවීම පිළිබඳ බොහෝ දෙනා ඇගයුම් කරති. 

කෙසේ වෙතත්, ආණ්ඩුව විසින් ඉදිරිපත් කර ඇති බුද්ධි අංශ වාර්තාවකට අනුව, වෛද්‍ය සචිත්‍ර දේශපාලන කටයුතුවල නිරත වන බවට චෝදනා එල්ල වී ඇති අතර, ඒ ආකාරයෙන් ඔහුගේ සේවය අවසන් කිරීමට තීරණය කර ඇත. එහෙත්, මෙම චෝදනාවලට සහාය වන කිසිදු තහවුරු සාක්ෂියක් හෝ ඔහුට එරෙහි පැමිණිල්ලක් හෝ වාර්තා වී නොමැත. ඒ නිසා, මෙම බුද්ධි අංශ වාර්තාවේ සත්‍යතාව පිළිබඳ බලවත් සැකයක් මතුව ඇත. 

බොහෝ දෙනාගේ මතය වන්නේ, මෙම තීරණය වෛද්‍ය සචිත්‍රගේ පියා වන සරත් වීරසේකර හිටපු අමාත්‍යවරයාගේ දේශපාලන ක්‍රියාකාරකම් හේතුවෙන් එල්ල වන පළිගැනීමක් බවයි. එහෙත්, වෛද්‍ය සචිත්‍ර තම පියාගේ දේශපාලනයෙන් ස්වාධීනව කටයුතු කළ අයෙකු බවත්, ඔහු රාජකාරියේදී කිසිදු වරදක් හෝ අකටයුත්තක් සිදුකර නොමැති බවත් ආරංචි මාර්ග සඳහන් කරයි.

විශේෂයෙන්, පොලිස් රෝහලේ වෛද්‍ය හිඟයක් පවතින මොහොතක මෙවැනි තීරණයක් ගැනීම බරපතල ගැටලුවක් බව දේශපාලන නිරීක්ෂකයෝ පෙන්වා දෙති. පොලිස් නිලධාරීන්ගේ සුබසාධනයට බෙහෙවින් බලපාන මෙවැනි තීරණයක්, දේශපාලන උවමනාවන් මත ගනු ලැබුවා නම්, එය පොලිස් සේවයේ සමස්ත යහපැවැත්මට බලවත් බලපෑමක් එල්ල කරනු ඇත.

මෙම තත්ත්වය පිළිබඳ ජනතාවගේ අවධානය යොමු වී ඇති අතර, වෛද්‍ය සචිත්‍ර වීරසේකර වැනි කැපවූ වෘත්තිකයකුට එරෙහිව ගනු ලබන මෙවැනි තීරණයක් යුක්තිසහගතද යන්න පිළිබඳ බලවත් සමාජ කතිකාවක් ඇතිව තිබේ.